တပ်ပေါင်းစုများကို လေ့လာခြင်း

တပ်ပေါင်းစုများကိုလေ့လာခြင်း

ရှင်းလင်းတင်ပြခြင်း

စာဖတ်သူများခင်ဗျား။

ကျွန်တော့် တပ်ပေါင်းစုများကိုလေ့လာခြင်းဆောင်းပါးတွင် NDF နှင့်ပတ်သက်၍ အချက်အလက်အချို့ကို NCUB ဝက်ဘ်ဆိုက်မှ ယူခဲ့သည့်အတွက် နောက်ပိုင်းတွင် သမိုင်းအချက်အလက်များ မှားယွင်းနေကြောင်း တွေ့ရပါသည်။ ထို့ကြောင့် ထိုမှားယွင်းနေသည့်အချက်အလက်များကို ပြင်ဆင်ဖြည့်စွက်တင်ပြလိုက်ပါသည်။ ကျွန်တော့်ချို့ယွင်းချက်ကို ခွင့်လွှတ်ပါရန် မေတ္တရပ်ခံအပ်ပါသည်။

NDF စတင်ဖွဲ့စည်းသည့်နေ့ မေလ ၁၀ ရက် ၁၉၆၇ ခုနှစ်။

NDF ပထဆုံး ဥက္ကဋ္ဌ မန်းဘဇံ။

NDF ကို (၉) ဖွဲ့နှင့် စတင်ဖွဲ့စည်းခဲ့ပြီးနောက်ပိုင်းတွင် အဖွဲ့ဝင် The Union Pao National Organization (UPNO) နှုတ်ထွက်သွားခဲ့ခြင်းနှင့် နောက်ပိုင်းတွင် အခြားတိုင်းရင်းသားအဖွဲ့အစည်းများဖြစ်သည့် NMSP (မွန်)၊ ဝ၊ လားဟူ၊ ချင်း (CNF) တို့ ပါဝင်လာခဲ့သည်။ အချုပ်မှာ NDFသည် အဖွဲ့အနေနှင့် DAB သို့ ဝင်ခဲ့ခြင်း မဟုတ်။ တစ်ဖွဲ့ချင်းအနေနှင့်ဝင်ခဲ့ခြင်းဖြစ်သည်။ ထို့ကြောင့် DAB သည် အဓိကတပ်ပေါင်းစုကြီးဖြစ်သည်။

ခေတ်ကာလအလိုက် NDF တွင် အဖွဲ့ဝင်များ အတိုးအလျော့ ရှိသည်။ ယနေ့ NDF အဖွဲ့များသည် စဖွဲ့ကာစ အဖွဲ့ဝင်များနှင့် ကွဲလွဲမှုရှိသည်။ NDF ကို မေလ (၁၀) ရက် ၁၉၇၆ ခုနှစ်တွင် တိုင်းရင်းသားအဖွဲ့အစည်း (၉) ဖွဲ့ဖြင့် ဥက္ကဋ္ဌအဖြစ် KNU မှ မန်းဘဇံကို ရွေးချယ်ဖွဲ့စည်းခဲ့သည်။

မည်သို့ပင်ဆိုစေ ကျွန်တော်မူလတင်ပြသည့် ရည်ရွယ်ချက်များသည် မပြောင်းလဲပါ။ NDF နှင့် ပတ်သက်၍ ရှင်းလင်းတင်ပြခြင်းသာဖြစ်ပါသည်။ သုတေသနလုပ်သူများအတွက် ရည်ရွယ်ပါသည်။ ကျွန်တော့်အား ထောက်ပြဆွေးနွေးကြသောတိုင်းရင်းသား ညီအစ်ကိုမောင်နှမများအားလည်း အထူးကျေးဇူးတင်ရှိကြောင်း မှတ်တမ်းတင်အပ်ပါသည်။ ဤစာနှင့်ပူးတွဲ၍ အမှားပြင်ဆင်ပြီဆောင်းပါးကို ပြန်လည်ပူးတွဲပေးပို့လိုက်ပါသည်။ ကိုးကားမှီငြမ်းထားသော ဝက်ဘ်ဆိုက်များ၏လိပ်စာများကိုလည်း ပူးတွဲပေးပို့လိုက်ပါသည်။

DAB စတင် ဖွဲ့စည်းစဉ်က General Strike Committee ကော်မတီပါဝင်ခဲ့သော်လည်း သမိုင်းပြုစုသူများက GSE ကို ချန်ထားခဲ့ပါသည်။ ထို့ကြောင့် ကိုယ်တိုင်တက်ရောက်သူတစ်ဦးအနေဖြင့် သမိုင်းကြောင်းအမှန်ကို ဖြည့်စွက်ထားခဲ့ပါသည်။

လေးစားလျက်

ထွန်းအောင်ကျော်

မြန်မာနိုင်ငံတော်ကြီး စစ်ကျွန်ဘဝမှ လွတ်မြောက်ရန်အတွက် ပြည်သူများ၊ တိုင်းရင်းသားအဖွဲ့အစည်းများ ဒီမိုကရေစီအင်အားစုများ ပူးပေါင်း၍ တပ်ပေါင်းစုများဖွဲ့ပြီးရင်းဖွဲ့ခြင်းဖြင့် ဒီမိုကရေစီ ရရှိမလာဘဲ တပ်ပေါင်းစုများသာ မှိုလိုပေါက်လာခဲ့သည်ကို ဘာလုပ်သင့်သလဲဆိုသည့်ဆောင်းပါးတွင် ဖေါ်ပြခဲ့ပြီးဖြစ်သည်။

တချို့က တပ်ပေါင်းစုတစ်ခုတည်းဖြစ်သည်ကို လိုလားပါသည်၊ သို့ရာတွင် မဖြစ်နိုင်၊ ဘယ်သူကမှ သူတို့တပ်ပေါင်းစုများကို ဖျက်လိမ့်မည်မဟုတ်ဟု စောဒကတက်ကြသည်။ ဖြစ်စေချင်သည်၊ သို့ရာတွင် မဖြစ်နိုင်ဟု လက်လျော့ချင်ကြသည်။ ထို့ကြောင့် တပ်ပေါင်းစုများမှိုလိုပေါက်နေသည့်ဇစ်မြစ်ကို တင်ပြ၍ ထိုတပ်ပေါင်းစုများကို မည်သို့ချုံ့ပစ်နိုင်သည်ကို တင်ပြဆွေးနွေးရန် ဤဆောင်းပါးကို ရေးသားလိုက်ပါသည်။

လွတ်မြောက်နယ်မြေတွင် အမျိုးသားဒီမိုကရက်တစ်တပ်ပေါင်းစု ((NDF (National Democratic Front) ) ကို မေလ ၁၀ ရက်နေ့၊ ၁၉၇၆ ခုနှစ်တွင် တိုင်းရင်းသားလက်နက်ကိုင်အဖွဲ့အစည်း (၉) ဖွဲ့ဖြင့် ဖွဲ့စည်းခဲ့ပြီး ဥက္ကဋ္ဌအဖြစ် မန်းဘဇံ၊ ဒုဥက္ကဋ္ဌအဖြစ် ခွန်ရဲနောင်၊ အထွေထွေအတွင်းရေးမှူး အတွင်းရေးမှူး ခွန်းတိုနီ (Tony) နှင့် ဗဟိုအလုပ်အမှုဆောင် (၁၂) ဦးဖြင့် ဖွဲ့စည်းခဲ့သည်။

NDF အဖွဲ့ဝင် အဖွဲ့အစည်းများမှာ

(၁) ကရင်အမျိုးသားအစည်းအရုံး (Karen National Union (KNU)) (Founding member)

(၂) ရခိုင်လွတ်မြောက်ရေးပါတီ (Arakan Liberation Party (ALP)) (Founding member)

(၃) ကယန်းပြည်သစ်လွတ်မြောက်ရေးပါတီ (Kayan Newland Liberation Party (KNLP)) (Founding member)

(၄) ပလောင်ပြည်နယ်လွတ်မြောက်ရေးအဖွဲ့(တပ်ဦး) (Pa-Laung State Liberation Organization (PSLO), Pa-Laung State Liberation Organization Front (PSLF)) (Founding member)

(၅) ပအို့ဝ်အမျိုးသားအဖွဲ့ (The Union Pa-o National Organization (UPNO)) (Founding Member)

NDF မှ ထွက်သွားပြီး နောက်ပိုင်းတွင် ပအို့ဝ်ပြည်သူ့လွတ်မြောက်ရေးအဖွဲ့ (Pao People Liberation Organization (PPLO)) နှင့် အစားထိုးခဲ့သည်။

(၆) လားဟူအမျိုးသားညီညွတ်ရေးပါတီ (Lahu National Unity Party (LNUP))

(၇) ရှမ်းပြည်တိုးတက်ရေးပါတီ (Shan State Progressive Party (SSPP)) (Founding member)

(၈) ကရင်နီအမျိုးသားတိုးတက်ရေးပါတီ (Karanni National Progressive Party (KNPP)) (Founding member)

(၉) ကချင်လွတ်မြောက်ရေးအဖွဲ့ (Kachin Independence Organization (KIO)) (Founding member) တို့ ဖြစ်ပါသည်။

နောင်တွင် NDF ၌ အောက်ပါအဖွဲ့များ ပါဝင်လာခဲ့သည်။ မူလတွင်ပါဝင်ခဲ့သောအချို့အဖွဲ့များ ထွက်သွားခဲ့ကြသည်။

ဝအမျိုးသားအဖွဲ့ (Wa National Organization (WNO))

မွန်ပြည်သစ်ပါတီ (New Mon State Party (NMSP))

ချင်းအမျိုးသားတပ်ဦး (Chin National Front (CNF))

လားဟူဒီမိုကရက်တစ်တပ်ဦး (Lahu Democratic Front (LDF))

မြန်မာပြည် ဒီမိုကရကစ်တစ်မဟာမိတ်အဖွဲ့ချုပ် (မဒမခ) Democratic Alliance of Burma (DAB) ကို ရှစ်လေးလုံးအရေးအခင်းအပြီး အမျိုးသားဒီမိုကရက်တစ်တပ်ပေါင်းစု (မဒတ (NDF)) မှ ကြီးမှုး၍ တောတွင်းသို့ ထွက်လာကြသောေ ကျာင်းသားများကို စုစည်းကူညီ၍ ကျောင်းသားညီလာခံကြီးကို နိုဝင်ဘာလ (၁) ရက်နေ့ မှစ၍ ၅ ရက်တိုင်တိုင် ကျင်းပပြုလုပ်ပေးခဲ့ပါသည်။ ထို့ကြောင့် နိုဝင်ဘာလ ၅ ရက်၊ ၁၉၈၈ ခုနှစ်တွင် မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး (All Burma Student’s Democratic Front (ABSDF)) ကို မွေးဖွားခဲ့ပါသည်။ ABSDF ပေါ်ပေါက်လာခြင်းနှင့် ၎င်းကျောင်းသားအင်အားစုများနှင့် NDF တို့ ပေါင်းစပ်နိုင်ရန်အတွက် ABSDF ဖွဲ့ပြီး ဆယ့်သုံးရက်အကြာတွင် ရေကျော် (ခရက်ဒေး) စခန်း၌ နိုဝင်ဘာလ ၁၈ ရက် ၁၉၈၈ ခုနှစ်တွင် NDF ကိုယ်စားလှယ်များ၊ ABSDF ကျောင်းသားခေါင်းဆောင်များ၊ မြန်မာပြည် ဒီမိုကရေစီ ပြန်လည်တည်ဆောက်ရေး ဦးစီးကော်မီတီ (CRDB) ကိုယ်စားလှယ်များ၊ Oversea Burmese Liberation Front (OBLF)၊ အဝေးရောက် ကရင်အစည်းအရုံး (Oversea Karen Organization (OKO))၊ မြန်မာနိုင်ငံလုံးဆိုင်ရာရဟန်းပျိုများသမဂ္ဂ (All Burma Young Monk Union (ABYMU))၊ ပြည်သူ့လွတ်မြောက်ရေးတပ်ဦး (People’s Liberation Front (PLF))၊  ပြည်သူ့ပြည်ချစ်ပါတီ (People’s Patriotic Party (PPP))၊ မြန်မာနိုင်ငံမွတ်စလင်လွတ်မြောက်ရေးအဖွဲ့(Muslim Liberation Organization Burma (MLOB))၊ All Burma Muslim Union (ABMU)၊ General Strike Committee (GSE) တို့ဖြင့် မြန်မာပြည်ဒီမိုကရက်တစ်မဟာမိတ် အဖွဲ့ချုပ် (မဒမခ) ကို ဖွဲ့စည်းခဲ့ကြပါသည်။ DAB သည် NDF ကို ကျောင်းသားအဖွဲ့၊ မြန်မာဒီမိုကရေစီ အင်အားစုများ၊ ရဟန်းပျိုအဖွဲ့စသည့် အဖွဲ့ (၁၀) ဖွဲ့ ထပ်ပေါင်း၍ ဖြစ်လာသည့် ပိုမိုကြီးမားသည့် တပ်ပေါင်းစုဖြစ်လာသော်လည်း မူလ တပ်ပေါင်းစု အမျိုးသားဒီမိုကရက်တစ်တပ်ပေါင်းစု (မဒတ (NDF)) သည် ရှိမြဲရှိနေခဲ့သည်။

လွှတ်တော်ကိုယ်စားလှယ်များ နယ်စပ်သို့ ထွက်ပြေးလာကြပြီးနောက် NCGUB ဖွဲ့စည်းပြီးသည့်အခါ NLD အဖွဲ့ဝင်များလည်း တသဲသဲ ထွက်လာခဲ့ကြသဖြင့် NLD (LA) ကို ဖွဲ့စည်းခဲ့ပြန်ပါသည်။ လွှတ်တော်အမတ်မင်းများ NCGUB ဖွဲ့ပြီး နောက်နှစ်အတော်ကြာတွင် ထပ်ထွက်လာကြရာ၌ တိုင်းရင်းသားပါတီမှ အမတ်များပါ ပါဝင်လာခဲ့ပြီး အမတ်ဦးရေ (၃၀) ကျော်ခန့် ရှိလာခဲ့သဖြင့် လွှတ်တော်ကိုယ်စားလှယ်များအဖွဲ့ကို ဖွဲ့စည်းကြပြန်သည်။

DAB တွင် NLD (LA) ပါတီက မဝင်ဘဲနှင့် ဒေါက်လေးထောက်စံနစ်ကို ကြွေးကြော်ကြပြီး NCUB ကို ဖွဲ့စည်းကြပြန်သည်။ NCUB တွင် NDF, DAB, MPU နှင့် NLD (LA) တို့ ပါဝင်သည်။ နောက်ပိုင်းတွင် DAB တွင် အဖွဲ့ဝင်သစ်များ ဝင်လာခဲ့သည်။ နောက်ပိုင်း DAB တွင် အဖွဲ့ဝင်သစ်များဝင်လာခဲ့သည် အဖွဲ့ဝင်သစ်များမှာ-

(၁) ပြည်သူ့တိုးတက်ရေးပါတီ (People Progressive Front (PPF))

(၂) ပြည်သူ့ကာကွယ်ရေးတပ် (People’s Defense Force (PDF))

(၃) လူ့ဘောင်သစ် ဒီမိုကရက်တစ်ပါတီ (Democratic Party for New Society (DPNS))

(၄) ရခိုင်ဒီမိုကရက်တစ်ပါတီ (Democratic Party of Arakan (DPA))

(၅) ရခိုင်အမျိုးသားဒီမိုကရေစီအဖွဲ့ချုပ် (Arakan League for Democracy (ALD))

(၆) နာဂအမျိုးသားဒီမိုကရေစီအဖွဲ့ချုပ် (Naga NLD)

(၇) မြိတ်ထားဝယ်ညီညွတ်ရေးတပ်ဦး (MDUF)

(၈) ဒီမိုကရေစီနှင့် ဖွံ့ဖြိုးရေးအင်အားစု (NDD)

(၉) မြန်မာနိုင်ငံအလုပ်သမားအဖွဲ့ချုပ် (FTUB) တို့ဖြစ်သည်။ DAB တွင် စုစုပေါင်းအဖွဲ့ဝင် (၂၅) ဖွဲ့ ရှိလာခဲ့သည်။

ပထမတွေ့မြင်သည့်အချက်မှာ တိုင်းရင်းသား နိုင်ငံရေးပါတီများ လူ့ဘောင်သစ်ပါတီတို့ DAB တွင် အဖွဲ့ဝင် အဖြစ်ဝင်ကြသော်လည်း NLD ပါတီလွက်မြောက်နယ်မြေမှာ မဝင်ဘဲ သီးသန့် ရပ်တည်နေခြင်းသည် အဓိပ္ပါယ်မရှိ ဖြစ်နေသည်။ အခွင့်ထူးခံယူထားသည်ဟု ပြတ်သားစွာမြင်သည်။ ပါတီကြီးသည် ငယ်သည်မရှိ၊ တန်းတူအခွင့်အရေးရှိရမည်ဖြစ်သည်။ ၁၉၉၀ ရွေးကောက်ပွဲတွင် နိုင်ထားသည့်ပါတီဖြစ်သည့်အတွက် တောတွင်းရောက်သည့်အခါ တပ်ပေါင်းစုထဲသို့မဝင်ဘဲ သီးခြားရပ်ပြီး NCUB ဖွဲသည့်အခါ ဒေါက်တိုက်ကြီး တစ်ခုအဖြစ်ပါဝင်သည်မှာ အကြည့်ရဆိုးလှပါသည်။ မဖြစ်သင့်ပါ၊ ဒါကတစ်ချက်။

NCUB ဖွဲ့စည်းခြင်း အခြေခံအင်အားစုများ-

NCUB= DAB+ NLD (LA)+ MPU ကို တွေ့ရမည်ဖြစ်သည်။

NDF တွင် တိုင်းရင်းသား လက်နက်ကိုင် (၉) ဖွဲ့ရှိသည်။

DAB= NDF (၉) ဖွဲ့+၁၈ ဖွဲ့= ၂၇ ဖွဲ့

NCUB= NDF (၉) ဖွဲ့ + ၁၈ ဖွဲ့+ NLD (LA) + MUP= ၂၉ ဖွဲ့ရှိသည်။

နောက်ဆုံး ပေါ်ပေါက်လာတဲ့ တပ်ပေါင်းစုကတော့ ဘော်ချက်ဖို့ လုပ်ထားသည့် တပ်ပေါင်းဟု မြင်ပါသည်။ နောက်ဆုံးပေါ် 7 Alliances ဆိုသည်မှာ-

NCUB+ NCGUB+ ENC+ WLB+ FDB+ NYF+ SYCB အဖွဲ့များ ပေါင်းထားခြင်းဖြစ်ကြောင်း ဟိတ်ဟန်ထုတ်ထားသော်လည်း အနှစ်သာရမှာ NCUB အား (၆) ဖွဲ့နှင့် ထပ်ပေါင်းထားခြင်းဖြစ်သဖြင့် NCUB ထက် ပိုမိုကြီးသယောင် ထင်ရပေသည်။ သေသေချာချာလေ့လာလျှင် NCGUB သည် NCUB တွင် ပါဝင်သည့် MPU မှ ဖွဲ့စည်းပေးလိုက်ခြင်း ဖြစ်သဖြင့် NCUB အဝန်းအဝိုင်းတွင်းပင် ရှိသည်။ ထို့အပြင် ENC သည် ဟန်ညောင်ရွှေမှ ဦးစီးပြီး ဥရောပမှ ထောက်ပံ့ငွေဖြင့် ၂၀၀၁ ခုနှစ် သြဂုတ်လတွင် ထူထောင်ခဲ့သော အဖွဲ့အစည်းဖြစ်သည်။ ENC တွင် ပါဝင်သောအဖွဲ့အစည်းများသည် တော်လှန်ရေးအဖွဲ့အစည်းများ (NDF)၏ လက်ခွဲအဖွဲ့များဖြင့် ပါဝင်ဖွဲ့စည်းထားခြင်းဖြစ်သည်။ အချို့ပြည်ပရောက်တိုင်းရင်းသားမျာကို ငွေကြေးထောက်ပံ့ပြီး တိုင်းရင်းသားအဖွဲ့များ ဖွဲ့ခိုင်းခြင်းဖြင့် တိုင်းရင်းသားလူမျိုးစုအားလုံးကို ကိုယ်စားပြုသယောင် ဟန်ပြထားခဲ့ခြင်းဖြစ်သည်။ အမှန်စင်စစ် ENC သည် တိုင်းရင်းသားခေါင်းဆောင်တချို့နှင့် ပြည်ပရောက်တိုင်းရင်းသားပညာတတ်များကို တိုင်းရင်းသားအမည်ခံအဖွဲ့အစည်းများအဖြစ် ငွေးပေးစည်းရုံး၍ ဖွဲ့စည်းထားသည့် အဖွဲ့သက်သက်သာဖြစ်သည်။ ENC အဖွဲ့ဝင်များ၏ နာမည်ကိုကြည့်လျှင်ပင် အကြံအဖန် ငွေရှိ၍ ဖွဲ့စည်းထားကြောင်းတွေ့ရမည်ဖြစ်သည်။ Arakan National Council, Chin National Council, Kachin National Organization, Karen State Coordinating Body, Karenni State Coordinating Body, Mon State Coordinating Body, Shan State Representative Council ဆိုသည့် နံမည်များသည် တိုင်းရင်းသားလူမျိုးနံမည်သာ ကွဲသွားပြီး အဖွဲ့အစည်းများ ပုံသဏ္ဍာန် နောက်ပြီး အမည်ကအစ ဆင်တူဖြစ်နေသည်ကို တွေ့ရမည်ဖြစ်သည်။ ဟန်ညောင်ရွှေက ငွေထုပ်ပိုက်၍ (ENC) ကြီးကြပ်စီစဉ်ချထား ဖွဲ့စည်းပေးလိုက်ခြင်းဖြစ်သည်။ Women’s League of Burma သည်လည်း တိုင်းရင်းသားအဖွဲ့အစည်း အသီးသီးမှ အမျိုးသမီးများကို ဖွဲ့စည်းပေးထား ခြင်းဖြစ်သည်။ ဥပမာ KNU အဖွဲ့အစည်းမှ KWO သည် ပင်မ KNU အဖွဲ့ခွဲပင်ဖြစ်သည်။ WLB အဖွဲ့ဝင်အများစုမှာ တိုင်းရင်းသား တော်လှန်ရေးအဖွဲ့အစည်းများမှ အမျိုးသမီးများဖြစ်ကြသည်။ WLB အနေနှင့် DAB သို့ဝင် သင့်သည်။

FDB Forum for Democracy in Burma (FDB) သည် ABFSU- FAC, ABSDF, BWU, DPNS, NDD, PDF, YCOWA နှင့် ဒီမိုကရေစီရေးလှုပ်ရှားသူ ပုဂ္ဂလိကများ ပါဝင်သည်ဟု ဆိုထားပါသည်။ FDB သည်အဖွဲ့မဟုတ် ဖိုရမ်ဖြစ်သည်။ FDB ဖိုရမ်တွင် တက်ရောက်သူများ သည် DAB အဖွဲ့ဝင်အများစုဖြစ်သည်ကို တွေ့ရမည်ဖြစ်သည်။ ဖိုရမ်ကို အဖွဲ့အမည်ခံ၍ 7 Alliance အဖွဲ့ထဲထည့်ထားခြင်းသည် ရိုးသားခြင်းမရှိဟု မြင်သည်။

တပ်ပေါင်းစုကြီးဖွဲ့ပြီး ၎င်းတပ်ပေါင်းစုထဲမှ တပ်ပေါင်းစုလေး ထပ်ဖွဲ့ပြီးထားခြင်းသည် ထိရောက်မှုထက် လုပ်ငန်းရှုပ်ထွေးမှု၊ အုပ်စုဖွဲ့မှုလုပ်ရပ်များဖြစ်ကြောင်း ထင်ရှားစွာ မြင်ရမည်ဖြစ်သည်။ တော်လှန်ရေးစကားဖြင့် ပြောလျှင် အိမ်ကြီးထဲတွင် အိမ်ငယ်ဆောက်သည့်သဘော၊ မလုပ်သင့်သည့် သဘောဟုမြင်သည်။ တပ်ပေါင်းစုတစုတည်း ဘာကြောင့်မလုပ်နိုင်သနည်း။ တပ်ပေါင်းစုအတွင်းမှာ ငါတို့အုပ်စုဖွဲ့၍ လူလယ်ကျရန်လား။ တပ်ပေါင်းစုကို ညီညွတ်စွာ ဝိုင်းဝန်းလုပ်ဆောင်ရင်း ညီညွတ်ရေး တည်ဆောက်ရန်လား။ မေးခွန်းထုတ်ကြဖို့ အချိန်ရောက်ပြီ။ FDB သည် လူလယ်ကျပြီး တပ်ပေါင်းစုကြီးကို အားနည်းစေရန် ဦးတည်ထားသည်ဟု သုံးသပ်သည်။ ညီညွတ်ရေးကို ရှေးရှုသော လုပ်ရပ်မဟုတ်ဟု မြင်သည်။ အားလုံးတွဲလုပ်ကြဖို့ထက် အုပ်စုဖွဲ့ပြီး ခွဲလုပ်ဖို့ ကိုယ့်မြင်းကိုယ်စိုင်းကြဖို့ စီစဉ်လုပ်ဆောင်မှုဟု မြင်သည်။

FDB ကို ဦးဆောင်နေသူမှာ NDD ဖြစ်သည်။ NDD ကိုကြည့်လျှင် ABSDF မှ ခွဲထွက်၍ တည်ထောင်ခဲ့ခြင်း ဖြစ်သည်ကို တွေ့ရမည်ဖြစ်သည်။ ABSDF ၏ ဦးဆောင်မှု ဗဟိုကော်မီတီ တစ်ခုလုံးနီးပါး နှုတ်ထွက်၍ လက်နက်ကိုင်လမ်းစဉ်ကို မယုံကြည်တော့ဟု စွန့်လွှတ်ထူထောင်ခဲ့သောအဖွဲ့ဖြစ်သည်။ ABSDF ကို ဦးဆောင်နေသော ဗဟိုကော်မီတီတစ်ခုလုံးက NDD အသွင်ပြောင်းပြီး ရဲဘော်များကို ငါတို့နောက်မလိုက်ရင် မင်းတို့ ၆ လခံရင် ကံကောင်းဟု ပြောဆိုကာ ခွဲထွက်သွားသည့်သူများ ဖြစ်သည်။ ABSDF ကို သံယောဇဉ်ထားဖို့ မဆိုးထားနှင့် ABSDF အဖွဲ့အစည်းကြီး ပျက်စီးရာပျက်စီးကြောင်းကို အဓိကလုပ်ဆောင်ခဲ့သည်မှာ NDD ပင် ဖြစ်သည်။ ABSDF အဖွဲ့အစည်း ခေါင်းဆောင်များဘဝမှ လက်နက်ကိုင်လမ်းစဉ်ကို မယုံကြည်၍ ထွက်သွားပြီး တစ်စင်ထောင်ခြင်းကို မပြောလိုပါ။ အစကတည်းက လက်နက်ကိုင်လမ်းစဉ်ကို ယုံကြည်၍ ဝင်လာကြသူများ မဟုတ်ခြင်းကို ၎င်းတို့ လုပ်ရပ်က သက်သေပြခဲ့ပြီးဖြစ်သည်။ ဆိုးဝါးသည်က ABSDF အတွက် ရရှိထားသည့် ရုံးသုံးပစ္စည်း Computer များကအစ သယ်ယူဖို့ ကြိုးစားခဲ့ခြင်းဖြစ်သည်။ သံလွင်စခန်းတပ်ရင်းမှူး သိန်းဆန်း ယနေ့ မဲဆောက်မြို့တွင် ရှိနေပါသေးသည်။ သိန်းဆန်းမှ တယ်လီဖုန်းဆက်၍ အကူအညီ တောင်းသဖြင့် ထိုကိစ္စကို လုံးဝလက်မခံနိုင်ကြောင်း အင်တာနက်မှ ရေးသားကန့်ကွက်ခဲ့သဖြင့် Computer တစ်ဝက် ခွဲယူသွားခဲ့ခြင်းခံခဲ့ရပါသည်။ အမှန်စင်စစ် ABSDF အတွက် ပေးထားသောပစ္စည်းများသည် NDD နှင့် လုံးဝ မဆိုင်ပါ။ ထို NDD သည် FDB ကို ဦးဆောင်ပြီး တပ်ပေါင်းစုထဲတွင် နောက်ထပ်တပ်ပေါင်းစုတစ်ခု ထပ်ဖွဲ့ခြင်းသည် စေတနာ မှန် မမှန် စဉ်းစားဖို့ လိုကြောင်း တင်ပြလိုက်ပါသည်။

လူငယ်အဖွဲ့အစည်းများပါဝင်သော Youth လူငယ်တွေ့ဆုံဆွေးနွေးပွဲဖိုရမ်ကိုလည်း အဖွဲ့အစည်းတစ်ခု အသွင်အဖြစ် FDB ထဲတွင် ထည့်သွင်းထားခဲ့သည်။ သတိမထားမိပါက အဖွဲ့အစည်းများသဖွယ် ထင်ယောင်ထင်မှား ဖြစ်နိုင်ချေရှိသည်။

အဓိကပညာပြချက်မှာ တပ်ပေါင်းစုထဲတွင် အုပ်စုဖွဲ့ချယ်လှယ်နိုင်ရန် ရည်ရွယ်၍ နိုင်ငံရေးအရ အမြတ်ထုတ်ရန် မရိုးသားသော ကြိုးစားအားထုတ်မှုပင်ဖြစ်သည်။

အချုပ်အားဖြင့် 7 Alliance သည် Proposal နိုင်ငံရေးအတွက် တီထွင်ဖန်တီးချက် တစ်ခုသာဖြစ်သည်။ တပ်ပေါင်းစုများမှိုလိုပေါက်လာခြင်းကြောင့် ထိုတပ်ပေါင်းစုများအောက်တွင် “ပြည်တွင်းလှုပ်ရှားမှု” လုပ်ငန်းများအတွက်ဟုဆိုကာ UG လုပ်ငန်းအကြောင်း၊ အကြောင်းပြ၍ စာရင်းပျောက်လုပ်စားကွက်များ ဖန်တီးယူနိုင်ပြီး တော်လှန်ရေးအဓွန့်ရှည်အောင် လုပ်စားခွင့် ရရှိနိုင်ကြမည်ဖြစ်သည်။

ထို့ကြောင့် တစ်ခုတည်းသောတပ်ပေါင်းစု ပြုလုပ်လိုလျှင် NLD (AL) နှင့် MPU နှစ်ဖွဲ့က DAB ဖွဲ့ဝင်အဖြစ် ဝင်လိုက်လျှင် DAB သည် ပြီးပြည့်စုံသော အဖွဲ့အားလုံးပါဝင်သည့် တပ်ပေါင်းစုကြီးအဖြစ် ရပ်တည်လာနိုင်မည်ဖြစ်သည်။ ထို DAB ဆိုသည့်နာမည်ကို မသုံးလျှင်လည်း ပါဝင်သော အဖွဲ့အစည်း အားလုံး၏ သဘောထားကို ရယူ၍ နာမည်အသစ်တခုကို ရွေးနိုင်သည်။ ထိုအခါ ထို DAB တပ်ပေါင်းစုသည် အဖွဲ့အစည်းအသီးသီးကို ကိုယ်စားပြုသော တစ်ခုတည်းသော တပ်ပေါင်းစုအဖြစ် ပေါ်ထွက်လာနိုင်မည်ဖြစ်သည်။ သို့မဟုတ်ပါက NDF မှ နိုင်ငံခြားဆက်ဆံရေး၊ ဘဏ္ဍာရေး၊ နိုင်ငံရေး၊ စီးပွားရေး၊ ပြည်တွင်းဆက်ဆံရေး၊ သီးခြားလုပ်သလို DAB မှာလည်း သီးခြား လုပ်ဆောင်မှုများ၊ NCUB မှလည်း သီးခြားလုပ်ဆောင်မှုများ ဒွေးရောယှက်တင် ဖြစ်နေပြီး မြင်သာထင်သာမရှိဘဲ စစ်အစိုးရကို တိုက်ခိုက်ရာတွင် စုစည်းမှုအင်အားမရှိဘဲ အားနည်းနေပေလိမ့်မည်။ ထိုကြောင့် စစ်အာဏာရှင်စံနစ်ကို တကယ်ဖြိုဖျက်လိုပါက တစည်းတလုံးတည်းသော ကျစ်လစ်ခိုင်မာသည့်တပ်ပေါင်းစုတစ်ခု ပေါ်ထွက်လာရန် စေတနာသန့်သန့်ဖြင့် ဝိုင်းဝန်းကြိုးစားကြဖို့လိုသည်။ ကျွန်တော်တင်ပြသောယူဆချက်ကို ဖြစ်သင့်သည်ဟု ယုံကြည်ပါက စာဖတ်သူများအနေဖြင့် ဝိုင်းဝန်းထောက်ခံအားပေးကြဖို့ အထူးသဖြင့် ထောက်ခံစာများ ရေးသား၍ ထိုအဖွဲ့အစည်းအသီးသီးရှိ တာဝန်ရှိပုဂ္ဂိုလ်များကို တိုက်တွန်း ဖိအားပေးကြဖို့ တာဝန်ရှိပေသည်။ စိတ်ထဲမှာ ကြိတ်၍ ထောက်ခံနေရုံနှင့် ပြောင်းလဲမှု ဖြစ်ပေါ်မလာနိုင်ပါ။ ကိုယ်တိုင်ပါဝင်ပြောဆိုရေးသားပေးကြဖို့ လိုအပ်သည်ဟု ပြောချင်ပါသည်။ ထိုအဖွဲ့ (၂၉) ဖွဲ့ကို ဖိတ်ကြားပြီး ညီလာခံကြီးတစ်ခု လုပ်သင့်သည်။ ထိုညီလာခံကြီးမှ တစ်ခုတည်းသော တပ်ပေါင်းစုကြီးကို တည်ဆောက်နိုင်မည်ဖြစ်သည်။ အဖွဲ့အစည်းအားလုံး ပါဝင်သော တစ်ခုတည်းသောတပ်ပေါင်းစုကို မတည်ဆောက်နိုင်သမျှ ကာလပတ်လုံး စစ်အာဏာရှင်စနစ်ကို တိုက်ရန် ဒုံးဝေးနေဦးမည်ဖြစ်သည်။ ပရိုပိုဆယ်စားပြီး နယ်စပ်တွင် လပ်ယားလပ်ယားလုပ်နေမည်လော၊ တကယ်ထိုးစစ်ဆင်နိုင်မည့် အင်အားစုတစ်ရပ်ကို ဖန်တီးယူကြမည်လော စဉ်းစားဖို့ အချိန်တန်ပြီ။ အဖွဲ့အစည်းအသီးသီးတွင် နိုင်ငံခြားထောက်ပံ့ငွေများ ဖြတ်တောက်ခံလာရခြင်းမှာ မရိုးသားမှု၊ လိမ်ညာမှု၊ တော်လှန်ရေးကို စိတ်ရောကိုယ်ပါ မယုံကြည်မှုတို့ကြောင့်ဖြစ်သည်။

အောက်ဖော်ပြပါ ဇယားကွက်တွင်ကြည့်ပြီး တပ်ပေါင်းစုတခုတည်းပြုရန် အလှမ်းမဝေးကြောင်း၊ လုပ်လျှင်ဖြစ်နိုင်ကြောင်း ထင်ရှားစွာတွေ့ရမည်ဖြစ်သည်။ တော်လှန်ရေး ရဲဘော်အားလုံးကို ပြောချင်သည်မှာ တော်လှန်ရေးကို သစ္စာရှိပါ၊ ရိုးသားပါ၊ ငွေရဖို့ တော်လှန်ရေး လုပ်နေခြင်းမဟုတ်၊ လွတ်လပ်ရေးရဖို့ တော်လှန်ရေးလုပ်နေခြင်းဖြစ်သည်။ ငွေရချင်လျှင် အလုပ်ထွက်လုပ်ပါ။ ငွေနောက်လိုက်၍ တော်လှန်ရေးကို ရောင်းမစားဖို့ ပြည်သူ့မျက်နှာထောက်ကြဖို့လိုပြီ။ ပြည်သူ့မျက်နှာမထောက်ဘဲ ဖောက်ပြန်နေသူများ၊ ကိုယ်ကျိုးရှာအုပ်စုဖွဲ့နေသူများကို ရှင်းဖို့လိုပြီဟု ပြောလိုက်ပါရစေ။

အစဉ်	ပထမတပ်ပေါင်းစု	ဒုတိယတပ်ပေါင်းစု	တတိယတပ်ပေါင်းစု	စတုတ္ထတပ်ပေါင်းစု
	NDF	DAB	NCUB	7Alliance
1	ALP	NDF + ABSDF +	DAB +	NCUB
2	CNF	OBLF	MPU +	NCGUB
3	LDF	OKO	NLD (LA)	ENC
4	PSLF	ABYMU		WLB
5	PPLO	CRDB		FDB
6	WNO	DPNS		NY Forum
7	NMSP	PLF		SYCB
8	KNLP	PPP
9	KNU	PPF
10		PDF
11		MLOB
12		ABMU
13		DPA
14		ALD
15		MDUF
16		NDD
17		FTUB
18		NNLD

နိဂုံးအားဖြင့် ယခင်လုပ်စားခဲ့သည်များကို ခဝါချရန် အသင့်ရှိပါသည်။ ယနေ့မှစ၍ အကျင့်ဆိုးများကို ပြင်ကြပါ။ အုပ်စုဖွဲ့ခြင်းထက် ဘယ်သူဘယ်လောက် လုပ်နိုင်သည် ခံယူချက် ပြင်းထန်မှုရှိသည် (Commitment) ရှိသည်။ ညီညီညွတ်ညွတ်နှင့် ယနေ့မှစ၍ တစ်ခုတည်းသော တပ်ပေါင်းစုဖွဲ့ပြီး လုပ်ကြမည်ဟု စိတ်ပိုင်းဖြတ် လုပ်ဆောင်ကြပါရန် တိုက်တွန်းလိုက်ပါသည်။

ထွန်းအောင်ကျော်